Er tað rímuligt, at ein tann besti málverjin í landinum ikki sleppur framat í bestu deildini, og at málverji, sum fyri stuttum var á venjingarlegu við landsliðnum, spælir í næstbestu deildini. Tað er aktuellur spurningur, nú Hans Jørgensen, sum var við landsliðnum á venjingarlegu í Thailandi fyrr í ár, vísti sannførandi avrik í EB/Streyma málinum ímóti KÍ mikukvøldið, og í gjárkvøldið aftur fór at kappast við Teit M. Gestsson, sum Oddbjørn Joensen heldur vera best skikkaða mannin at verja HB málið.
– Eg haldi, at tað gekk væl, og eg vóni, at avrikið hjá mær í EB/Streyma málinum ger, at tað verður torførari hjá venjaranum at halda meg burtur úr málinum hjá HB. Teitur og eg samstarva væl, og vit fáa nógv burturúr at venja saman. Sjálvandi vilja vit báðir verja málið á besta liðnum, men vit virða avgerðina, sum venjarin tekur. Eg vóni, at hann fer at geva mær møguleikan á Sandi sunnudagin, sigur 22 ára gamli Hans Jørgensen.
HB venjarin Oddbjørn Joensen var í Klaksvík mikukvøldið. Hann sá Hans Jørgensen vísa sannførandi málverjuspæl:
– Eg havi áður sagt, at vit hava tveir javnt góðar málverjar, og at vit hava valt Teit framum Hans, tí Teitur í fjør spældi saman við verjuni, sum vit framvegis hava. Í EB/Streyma málinum mikukvøldið vísti Hans, at tað ikki órógvaði avrikið hjá honum, at hann spældi saman við nýggjari verju. Hann var góður á strikuni, hann var sannførandi í luftspælinum, og hann var eminentur í at spæla bóltin skjótt og væl frá sær, heldur HB venjarin.
Tað vil siga, at kappingin um plássið í HB málinum er vorðin uppaftur tættari?
– Hon hevur alla tíðina verið tøtt. Vit hava tosað við málverjarnar um, at tá ið teir eru so javnt góðir, so mugu báðir fáa møguleikan á besta liðnum. Ætlanin hevur verið, at Hans skal spæla, og hann verður í málinum, tá ið vit sunnudagin fara til Sands at spæla í kappingini um løgmanssteypið.
Oddbjørn Joensen sigur, at EB/Streymur heitti á HB um at fáa loyvi at leiga Hans í 5-6 dystir.
– Tað hildu vit ikki bar til, tá ið vit bara hava tríggjar málverjar til tvey lið. Vit høvdu einki ímóti at hann fekk møguleikan mikukvøldið, og tá ið hann er so stinnur, sum hann vísti seg at vera, so eiga vit eisini at geva honum møguleikan hjá okkum. Fyri venjingarnar hevur tað nógv at siga, at vit hava tveir góðar málverjar, og vit fara at halda báðum til, sigur Oddbjørn Joensen.
HB eigur næstan eins nógvar finalusigrar í steypakappingini sum øll hini feløgini tilsaman. Seinnu árini hevur tað tó ikki hilnast eins væl. HB hevur ikki vunnið steypakappingina síðani í 2004.
