Prát við Arne Winthereig, formann í Unga Sambandi, sum viðmælir at Rúsan hevur opið leygardagar.
Fert tú í Rúsuna leygardagin?
- Ja, um tað verður opið, so kann tað væl verða.
Hví skal Rúsan hava opið leygardag?
- Hví ikki? Spurningurin er, hví tey, sum ikki ganga í Rúsuna, skulu bestemma, nær tey, sum ganga í Rúsuna, kunnu fara í Rúsuna. Hetta snýr seg um at hava frælsi at velja, og um at ein minniluti við sterkari trúgv ella trupulleikum ikki skal forða einum meiriluta í at gera nakað.
Skal Rúsan hava opið sunnudag?
- Um tað er tørvur á tí, so er tað í lagi fyri mítt viðkomandi.
Tit siga, at upplatingartíðirnar hjá Rúsuni kunnu vaksa um trivnaðin hjá ungdóminum. Hvussu hongur tað saman?
- Um ungfólk fáa frælsi at velja tað, sum tey ynskja, so økir tað um trivnaðin. Í hesum føri eiga tey at sleppa í Rúsuna at keypa rúsdrekka leygardag, um tey vilja tað.
Hvønn frían møguleika saknar tú í Føroyum?
- At fólk kunnu fara á náttklubba, tá tey hava tørv á tí, og at ein gomul Halgidagslóg ikki forðar teimum.
