Tað hava verið og eru ring koyrilíkindi kring alt landið. Tá løgreglan stongdi vegin á Kambsdali vóru boð eftir sjúkrabili í Fuglafirði. Men tað bar ikki til at fáa sjúkrabil til Fuglafjarðar í ringa veðrinum. Men seinni var ein skái, og tá fylgdi ein sløkkiliðsbilur sjúkraflutningsbilinum.
Hann kundi kortini ikki koyra til Havnar á Landssjúkrahúsið, tí tað er ikki koyrandi á Kaldbaksvegnum.
Sámal Johannes Hansen frá sjúkraflutningstænastuni á Landssjúkrahúsinum segði við útvarpið, at sjúklingurin tí var futtur til Klaksvíkar.
Hann segði, at fólk misskilja tað, um tey halda, at sjúkrabilar kunnu koyra, tá aðrir bilar ikki kunnu koyra.
– Ein sjúkrabilur er bara ein bilur. Vit koyra bara, um tað er hægst neyðugt. Vit seta ikki mannalív í váða, segði hann.
