Høgni Lisberg hevur gjørt sáttmála við amerikanskt plátufelag, um at fløga hansara Haré Haré verður útgivin í USA og Kanada. - Hetta er tað størsta, sum er hent fyri meg higartil, sigur Høgni Lisberg.
Haré Haré kemur á amerikanska og kanadiska marknaðin í ár. Plátufelagið Spectra Records setti seg í samband við Høgna Lisberg herfyri.
- Eg merkti væl, at teir vóru ógvuliga áhugaðir, so eg skuldi næstan bara siga ja og skriva undir, greiddi Høgni Lisberg frá á Rás2 í dag.
Í oktober í fjør fekk Høgni Lisberg lagið Bow Down á kurvabóltsspælið NBA 2K 11. Eitt spæl, sum helst fer at selja um eina millión eintøk. Hetta hevur havt sína ávirkan til, at Høgni Lisberg nú hevur fingið sáttmála við Spectra Records, heldur hann.
- Teir søgdu, at teir høvdu hoyrt lagið, áðrenn tað kom á soundtrackið til NBA-spælið, men helst eru tað ringar í vatninum eftir tað, sum eg nú merki, sigur Høgni Lisberg. Hann greiðir frá, at hetta hevur sera stóran týdning fyri hann sum tónleikara, tí tað er trupult at fáa fótin inn um á amerikanska marknaðinum.
- So nú eri eg heilt ótrúliga spentur, sigur Høgni Lisberg.
Tað er ikki greitt nær Haré Haré kemur á amerikanska og kanadiska marknaðin, men tað verður í hesum árinum.
