Høg ferð við sjóvarmálan - lítil ferð í miðbýnum

Seinastu tvey árini hevur nógv virksemi og nógv ferð ver­ið við havnalagið á Tvør­oy­ri.
Alt, síðan farið varð undir at byggja uppsjóvarvirki hjá Varðanum Pelagic, sam­stun­d­is sum farið varð undir at byggja fyrsta partin av djúp­havn­ini, hevur verið ar­beitt við bryggjukantin og á havna­lagnum.
Í løtuni verður djúphavnin bygd út við 180 metrum av at­løgu­síðu, og ætlandi skal hetta arbeiði verða liðugt tíð­liga í summar. Hetta er eitt arbeiði, sum fer at kosta ei­n­ar 40 miljónir krónur og sum fer at gera umstøðurnar við bryggju­kantin og á havna­lag­num nógv betri, enn tær eru í dag.
Útbyggingin merkir so­leið­is, at bryggjukanturin verð­ur nógv størri, eins og Tvør­oy­r­ar kommuna fær eitt nógv størri uppland.

Minni ferð í miðbýnum
Samstundis, sum nógv ferð er á havnalagnum á Tvøroyri, verð­ur ferðin í miðbýnum min­k­að.
Í gjár boðaði Tvøroyrar kommu­na frá, at frá í dag at rokna - hin 17. februar - verða ferðslubroytingar í miðbýnum á Tvøroyri sett­ar í verk. Hesar broyt­ing­ar verða gjørdar við ferðslu­trygg­leika­num í huga.
- Ferðslubroytingarnar mer­k­ja, at allur miðbýurin verð­ur eitt 30 km. øki, soleiðis at bilar ikki hava loyvi at koyra meira enn 30 km/t.
Á heimasíðuni hjá Tvør­oyr­ar kommunu er neyvt kort og kunning, sum lýsir, hvar 30 km. hámarkið er gald­andi.