“Tú Høgni, tað er ómetaligt, sum Havnin er blivin hugnalig. Øll trøini og øll tey grønu fríøkini. Tað er virkuliga hent nakað tey síðstu árini”.
Orðini eigur ein havnarmaður, sum hevur búð meginpartin av lívi sínum á flatlondum. Nú hann var komin aftur á klettarnar, fegnaðist hann um ta “Deiligu Havn”.
Tórshavnar kommuna skal halda fram við hesi kós at leggja av øki til viðarvøkstur og frílendi, har fólk kunnu hugna sær og stytta sær stundir.
Ein stór ætlan er gjørd saman við landsstýrinum fyri Hoydalar. Kommunan hevur verið sinnað at seta pening av, men landið hevur hildið aftur. Komandi býráð má fáa landið við í hesa ætlanina, so hon kann blíva veruleiki.
Árliga umhvørvisvikan og pakkarnir við runnum og trøum frá kommununi eggjar fólki at gróðurseta, og hon skal avgjørt halda fram.
Ein størri framtíðarætlan um fríøki og grøn øki millum býlingar eigur at verða løgd, so at øll í Havn bara hava nakrar hundrað metrar til eitt grønt øki, eins og gjørt verður í eitt nú Reykjavík. Harafturat eigur Tórshavnar býráð av álvara at hugsa um at lata uppaftur ein part av Havnará “fyri at fáa gamla og tiltikna áartutlið aftur í miðbýin”, sum skilagóð fólk hava tikið til.
Vísa tit mær álit á valdegnum tann 8. november, vil eg leggja alla orku í at fáa ein uppaftur vakrari, hugnaligari og grønari høvuðsstað.
Set X við Høgna Joensen - Valevni á lista C
