Smittutølini í Grønlandi hava seinastu dagarnar verið rættiliga ógvuslig, og einki er, sum í løtuni bendir á, at tølini fara at minka fyribils.
Í dagføring hjá landslæknaembætinum í Grønlandi í gjár vóru smittutølini týsdagin 524, og í dag er talið av nýggjum tilburðum 457.
Hetta gevur 981 nýggjar tilburðir í tvey samdøgur, sum er eitt stórt tal - eisini í mun til føroysk viðurskifti, har okkara smittutøl eisini hava verið stór.
Smittan í Grønlandi spjaðir seg serliga í høvuðsstaðnum Nuuk, har staðfestir eru 283 nýggir tilburðir - og í Ilulissat, har talið seinasta samdøgrið var 143.
Hjá landslæknaembætinum í Grønlandi siga tey, at tilsamans 10 fólk eru innløgd - nøkur orsakað av koronu og onnur av øðrum orsøkum.
