Víkingur - ÍF 1-1 (1-1)
1-0: Bárður Hansen 7.
1-1: Karl Løkin 35.
Dómari: Eiler Rasmussen
Talan var tó ongantíð um ófantaligt spæl. Longu í 3. minutti hevði Eiler Rasmussen gula kortið á lofti fyri fyrstu ferð. Tá var tað Ari Ó. Ellingsgaard hjá ÍF, sum sá gult. Seinni vórðu tríggir víkingarskrivaðir upp í bókina.
Fyrstu løtuna sat heimaliðið á øllum, og longu í 7. minutti setti Bárður Hansen, sum hesa ferð var framrættaður í høgru, hol á, tá ið hann sendi bóltin framvið Jákupi Mikkelsen, ið eftir langan skaðasteðg var aftur í ÍF málinum.
Orsaka av skaðum var ÍF í heilt aðrari útgávu enn tí kendu. Bartal Eliasen var í álopinum saman við Clayton Soares, og Fritleif í Lambanum var miðverji saman við Poul N. Mikkelsen, meðan Áki Petersen røkti vinstra vongverja.
Fyrstu løtuna var ÍF miðvøllurin í diamantlíki, sum tað verður sagt. Eftir heimamálið varð hetta broytt, og tá ið Karl Løkin aftur varð komin á verjukenda miðvallarplássið, fingu gestirnir betri tak á spælinum. Hjá heimaliðnum var tað smeitur, at Atli Gregersen undir upphitingini noyddist at taka seg aftur orsaka av skaða. Súni Olsen varð miðverji saman við Erlingi Jacobsen, og harvið vóru tað Hans Jørgen
Djurhuus og Ingi Sørensen, sum vóru sentralir miðvallarar.
ÍF yvirvágin bar mál við sær, tá ið tað restaðu tíggju minuttir av fyrra umfarinum. Tað málið tók Víkinga málverjin á seg. Karl Løkin royndi seg úr 35 metrum, og bólturin fór framvið málverjanum og í málið!
ÍF venjarin Albert Ellefsen var væl nøgdur við 1-1:
– Hetta kemur væl við. Seinast vórðu vit avsmurdir á heimavølli ímóti B36, meðan Víkingur vann tryggjan heimasigur á KÍ. Tað kundi verið uppaftur betri, tí í síðsta minutti spældi Clayton Soares Bartal leysan, men sendingin var akkurát ikki nóg neyv. Tá ið havt verður í huga, at vit saknaðu fleiri skaddar spælarar, so var hetta væl at liva við. Nú eiga vit Skála, AB og B68. Um vit skulu lyfta okkum nærri móti toppinum, so er neyðugt, at vit vinna næstu dystirnar, var viðmerkingin hjá Alberti Ellefsen.
Víkinga venjarin vildi vera við, at ÍF hevði roynt seg við longum sendingum og við at gyppa í allar 90 minuttirnar:
– Vit royndu at spæla fótbólt, og úrtøkan var tann sama. Nú eru vit kroystir at vinna, um vit skulu røkka toppin, sum vit halda, at vit eiga at vera partur av. Hini liðini fara undan okkum, og nú er spurningurin, um vit skulu vera minni undirhaldandi og spæla einfaldari. Kortini haldi eg, at vit høvdu betri uppiborið, tí fyrstu løtuna, tá ið Finnur rakar stólpan í staðin fyri at økja til 2-0, og síðsta korterið hava vit teir undir stórum trýsti. Tað vísir seg vera torført at vinna grannauppgerðirnar, og tá ið tað eru so nógv lið úr Eysturoy í kappingini, so verður tað torført hjá okkum og øðrum Eysturoyarliðum at vinna FM.
joannes@sosialurin.fo
