Ofta verður sagt, at grønlendingar drekka illa, og at teir drekka nógv verri enn eitt nú danir. Men tað er ikki rætt. Tey seinastu tjúgu árini er rúsdrekkanýtslan í Grønlandi minkað sera nógv við tí úrsliti, at nú drekka grønlendingar minni enn eitt nú danir. Tað sigur grønlendska útvarpið. Tølini vísa, at fyri tjúgu árum síðani drukku grønlendingar 22 litrar av reinum alkioholi í part um árið. Í fjør var nøgdin 10,5 litrar. Gongdin í grønlendsku rúsdrekkanýtsluni fekk drúgva umrøðu á einari ráðstevnu í Ålandi í august, og grønlendsku myndugleikarnir fingu rós, sigur KNR.
