Vanur lá dalur frá fornari tíð
Latin úr alvísum hondum
í eystri sæst havið við Lambalíð
alt albeitt at fjørusondum
So friðfylt reisir seg Glyvrafjall
Við liðina Gásafelli
Høgaleiti og Reynabrúgv
Hvítna av mosa og elli
So grøn er líðin og ovara lág
og Tungubrúgv er har digst íhjá
Við spælandi lombum um summartíð
Á hjálmabakka og grasgóðu líð
Nú stoytt er við klettin um Kópafles
Tað andar av hvirru um flúr og nes
Um Skammarøkur og Illendisstøð
Grasgóðan haga til ovastu røð
Góðveður tám hylir hól og heyt
Ógloymandi summarløtur
Brandandi sól á vesturleið
Gyllir Glyvradals fløtur
John Reynbú 20/3-08
