Tey seinastu árini eru vit vorðin varug við, at ein aðtastaðni ógvuliga sjáldsom sjúka, sum tey á enskum rópa »Glykogen storage disease type III A« rættiliga ofta kemur fyri í Føroyum. Á føroyskum kunnu vit rópa sjúkuna glykogen-goymslu-brek, stytt GGB. Sjúkan kemur í hvussu so er líka ofta fyri sum viðføtt stoffskifti (myzødem) og tvær til tríggjar ferðir so ofta sum Föllings sjúka (fenylketonuri). Báðar hesar sjúkurnar verða øll nýfødd kannað fyri. Við tað at fólk ikki nýtist at merkja nakað til sjúkuna í fyrstani, halda vit, at tað er rímiligt at upplýsa bæði starvsfólki innan heilsuverkið og almenningin í Føroyum eitt sindur um hesa sjúkuna.
Aftaná at tú hevur etið, verður yvirskotið av kolhydratum (sukur) vanliga goymt antin sum feitt ella stívilsi í livrini, vøddunum ella hjartanum. Meira enn 15 ymisk sløg av GGB eru kend í løtuni. Tað slagið, sum vit hava sæð í Føroyum, hevur frámerkið »III A, amyloglukosidasu mangul« (ella eisini eftir teimum fyrstu, sum ávístu sjúkuna: »Cori-« or »Forbes-«sjuka.) Fólk við sjúkuni GGB eru ikki før fyri at nýta stívilsi og at umlaga tað til sukur, tá blóðsukrið lækkar. Í minsta lagi 12 fólk í Føroyum hava GGB III A. Til samanberingar verður mett at umleið 100.000 fólk í allari verðini hava sjúkuna. Hetta kundi bent á, at minst ein av tríati føroyingum er berari av sjúkuni. Berarin sjálvur er frískur, men um tveir berarar fáa eitt barn, eru tað 25% (t.v.s. ein av fýra) møguleikar fyri at hetta barn hevur sjúkuna. Síðan 1994 eru 6 børn í Føroyum fødd við GGB III A.
Vit á barnadeildini á Landssjúkrahúsinum fara at bjóða til fundar í Gestaborðstovuni á Landssjúkrahúsinum leygardagin 27. januar kl. 14, at greiða nærri frá sjúkuni:
? Hvørji eru sjúkueyðkennini hjá børnum?
? Hvussu eru sjúkueyðkennini hjá vaksnum fólki?
? Hvørjir eru viðgerðarmøguleikarnir?
? Hvørji eftirlit skulu fyriskipast?
? Hvussu kanst tú vita, um tú sjálvur ert berari av sjúkuni?
? Hvør eigur at vita um sína beratastøðu?
Ætlanin er at greiða frá á einum støði, ið almenningurin er førur fyri at skilja. Tað vera Bettina N. Hansen, 1. hjálparlækni á Landssjúkrahúsinum, Andrew Hicks, biokemikari, Sepideh Taheri, barnalækni á Landssjúkrahúsinum og Ulrik Steuerwald, fyrrverandi barnalækni á Landssjúkrahúsinum, sum greiða frá og svara spurningum.
Øll, sum hava áhuga at fáa meira at vita um hetta viðfødda brek, eru vælkomin.
