Fótbóltur
Tað var ein vónbrotin HB liðskipari, sum eftir dystin móti B36 skuldi gera viðmerkingar til dystin. Fyrst og fremst orsakað av tapinum, men sjálvsagt eisini, tí dysturin fyri hansara viðkomandi endaði heldur fyrr enn ætlað, tá dómarin gav honum reyða kortið.
- Eg haldi í øllum førum, at dómarin væl kundi verið hatta reyða kortið fyri uttan. Eg segði við hann, at hann mátti sæð, at talan var um hornaspark, og um eg sum liðformaður ikki kann gera eina slíka viðmerking, so dugi eg ikki at síggja, hvat eg skal hava hatta armbindið til, sigur Rúni.
- Eg haldi eisini, at hann (Lassin) varð eitt sindur skakkur, tá hann gav mær reyða kortið. Sum um hann ikki visti av, at eg hevði eitt gult kort framman undan.
Stóra ávirkan
Hann helt annars, at dømingin hjá Lassanum Isaksen so avgjørt ikki kom HB til góðar á nakran hátt.
- Eg skal ikki siga, at B36 ikki var betra liðið, men í øllum førum hevur hann tveir dómar, sum eru sera dýrir fyri okkum. Hann sær ikki, at Kenneth nýtir hondina við fyrra málinum, og so gevur hann mær reyða kortið. Tað er so í øllum førum nakað, sum hevði avgerandi ávirkan á úrslitið.
- Sjálvt Ion segði seg eftir dystin vera ónøgdan um dømingina. Tað havi eg so ongan tíð hoyrt hann siga fyrr. Tvørtur ímóti plagar hann at leggja áherðslu á, at vit ikki skulu trætast við dómaran.
- Tað er eitt sindur frustrerandi, at vit nýta fimm dagar um vikuna til at venja, fyri síðani at fáa dystin oyðilagdan av dómaranum. Tað er næstan so, at mann fer at hugsa um, hvørt tað hevur nakað endamál at taka lut í øllum hesum venjingunum, sigur ein harmur Rúni Nolsøe.
Gloym gullið
Spurdur, um tapið eisini hevur við sær, at HB ikki longur fer eftir gullmerkjunum, sigur Rúni, at tað kann mann kanska.
- Fyribils haldi eg í øllum førum, at vit kunnu gloyma alt um gullið. Har er munurin vorðin alt ov stórur. Vit mugu fyri fyrst fara eftir bronsumerkjunum, har VB nú er farið upp um okkum, og so mugu vit bara taka tað, sum tað kemur.
