Danska teknistovan Bjarke Ingels Group er komin við einum uppskoti um, hvussu nýggja høvuðssæti teirra í Norðhavnini í Keypmannahavn skal síggja út. Men tey vórðu vend í hurðini av kommununi, tá verkætlanin varð løgd fram, sambært TV2 Lorry.
Ein meiriluti í teknisku- og umhvørvisnevndini hjá Keypmannahavnar kommunu var samdur um, at bygningurin ikki var nøktandi. Býráðslimir vildu vera við, at bygningurin var ov ljótur, og hann passaði ikki inn í býarmyndina. Hann verður kallaður “søguliga ljótur”, og harumframt var hann ikki nóg umhvørvisvinarligur, varð mett.
Bygningurin á 27 metrar skuldi í høvuðsheitum vera gjørdur úr glasi og betongi. Tað kann væntast, at BIG koma við einum nýggjum uppskoti um kontórbygningin, skrivar TV2 Lorry.
Í Føroyum kenna vit Bjarke Ingels Group fyri byggiverkætlanina Glasir, sum danska teknistovan hevur teknað.
