– Vit hava í tvey ár havt ein postkassa standandi, har vit heita á tey ferðandi at leggja 50 krónur í. Men tað eru fá, sum hava lagt pengar í, sigur Páll Sivertsen, formaður í hagastýrinum Fyri oman rætt – Fjallið við Gjógv.
Summahálvuna hevur hann tømt postkassan hvønn dag, men tað eru ikki nógvir pengar í.
– Onkran dag kunnu 100 krónur vera í, og onkran einstakan dag kunnu 2000 krónur vera í. Men vit síggja, at nógv fleiri fólk fara í hagan. Vit hava hugsað at gjørt okkurt líknandi sum bóndin í Saksun, men nú mugu vit síggja, hvat tað verður til við Jarðir, sigur Páll Sivertsen.
Postkassin er bara uppi um summarið og ikki um veturin.
Dryppar ikki av til bygdina
Formaðurin heldur ikki, at ferðavinnan gevur nógv til Gjáar bygd.
– Gjáargarður fær sjálvandi nakað, men annars dryppar ikki nógv av til Gjógv. Tað koma í hundraðtali av ferðafólki til Gjáar hvønn dag um sumrarnar, men tað eru ikki vit, sum búgva her, ið fáa inntøkurnar, sigur hann.
Hagin bjóðar saman við grannahaganum útferð til Ambadals við ferðaleiðara. Men higartil eru tað ikki so nógv, ið hava valt tann túrin.
Ferðafólkið vitjar niðri í Gjónni, og so eru eisini fleiri, ið ganga fram við Gjónni og fara niðan á Barm. Hetta er hagin, har Páll Sivertsen er formaður.
– Gøtan var sera illa slitin, og í fjør gjørdu vit saman við kommununi og Visit Faroe Islands einar trappur, har tað ber til at ganga. Hetta hevur hjálpt munandi, tí bøurn var sera illa slitin. Kort er eisini sett upp og pílar eru, sum vísa, hvar ein skal ganga, sigur hann.
Pengarnir, ið eru komnir inn til hagan, eru farnir til at bøta um gøtuna.
