Verkætlanin MacroBiotech hevur einaferð enn fingið stuðul til at ala tara. Felagið Ocean Rainforest, við Ólavi Gregersen á odda, hevur sett gongd á verkætlanina.
Talan er um 425.000 krónir frá NORA, sum er ein felagsskapur undir Norðurlandaráðnum. Í fjør fekk verkætlanin eina hálva millión.
MacroBiotech hevur 1100 metrar av tara línu standandi á Funningsfirði.
Fyri tveimum vikum síðan, heystaði felagið nýggjastu royndirnar, sum nú skulu greinast í Íslandi og framleiðsluroyndir gerast í Danmark.
Tað verður kannað, um tað letur seg gera at framleiða fóður og gróðurevnir úr taranum.
-Tað fer væntandi at taka eitt til tvey ár, áðrenn tað ber til at siga, um tað ber til at fáa vinnuligan rakstur burtúr, sigur Ólavur Gregersen, stjóri í Ocean Rainforest.
Samlaða verkætlanin kostar 2,3 milliónir krónir.
