Á býráðsfundi í Havn hóskvøldið samtykti Tórshavnar Býráð at gera broytingar í byggisamtyktini fyri Kollafjørð fyri vinnuøkið á Signabø. Talan er um stóra økið, sum varð fylt upp við tilfarinum frá undirsjóvartunlinum um Vestmannasund. Í verandi byggisamtykt er økið lagt sum vinnuøki, meðan Tórshavnar Býráð nú hevur samtykt at økið skal verða havnarøki.
- Hetta økið hevur ligið í órøkt seinastu árini. Vit ælta nú at planera og asfaltera økið og gera ein bryggjukant, sigur Heðin Mortensen, borgarstjóri.
Ætlanin er eisini, at hallir skulu kunna byggjast á økinum.
Borgarar í Kollafirði hava mótmælt ætlanini, m. a. tí, at hetta hevur óhepin árin á umhvørvið, og at tað ger liviumstøðurnar hjá íbúgvunum á Signabø verri. Eisini halda tey, at larmur o. a. í sambandi við bygging av bingjuhavn í økinum fer at hava minkandi sethúsavirði við sær.
Í samtyktini hjá býráðnum frá hóskvøldinum stendur, at ítøkiliga avgerðin, sum kommunan hevur tikið støðu til, kann lýsast við, at kommunan fær eina týðandi havnarútbygging fyri minst møguligan kostnað og við minst møguligum inntrivum í náttúruna og helst ongum eyka ampa samanborið við umstøðurnar í dag fyri borgararnar kring havnina.
Tey, sum hava kært, mæla til, at leggja havnina úti á Spermi, men hesum tekur býráðið so ikki undir við.
Fyri málinum atkvøddu: Heðin Mortensen, Kári Árting (sum hevur sæti fyri Jógvan Arge), Leivur Hansen, Hildur Eyðunsdóttir, Marin Katrina Frýdal, Inga Dahl (sum hevur sæti fyri Anniku Olsen), Sjúrður Olsen, Høgni Mikkelsen og Jan Christiansen.
Í móti málinum atkvøddi: Beate L. Samuelsen, meðan Katrin Dahl Jakobsen og Elin Lindenskov ikki greiddu atkvøðu.
