Eydnuspæl er eydnuspæl, og hetta varð eisini prógvað í gekka-spælinum í kvøld, tá Dan Andreassen í Leirvík fekk høvi at royna eydnuna.
- Eg eri settur her at spæla. Tað er vaktarskifti at eta, og nú sat eg einsamallur eftir við gekkunum.
Høvuðsvinningurin í kvøld var á 2,8 miljónir krónur, og Dan Andreassen valdi at hava allar pengarnar liggjandi í gula leypinum.
Alternativið, sum gekka-verturin, Magnus Magnussen, bjóðaði honum, var at deila upphæddina í trý - við 950.000 krónum í hvørjum leypi.
Men, Dan Andreassen valdi at taka kjansin fult út, nú hann hevði høvið til tess!
Longu í fyrstu royndini steðgaði hjólið á bláa leypinum. Hevði valið hjá leirvíkinginum verið øðrvísi, kundi ein lítil miljón nú ligið í leypinum.
Her var so í staðin ein góður vinningur frá Idé Møblum - nevniliga eitt keyp í handlinum á Hálsi fyri heilar 100.000 krónur.
Men, Dan Andreassen valdi at royna eydnuna um pengarnar aftur.
Í aðru royndini steðgaði hjólið á 40.000 krónum, sum faldað við tvey hevði givið honum 80.000 krónur.
- Vit taka síðsta møguleikan eisini, segði leirvíkingurin, sum løtu eftir setti hjólið í gongd aftur í triðju og seinastu royndini.
Hesaferð steðgaði hjólið á 20.000 krónum, men tað vísti seg ikki at vera ein vónsvikin maður, sum takkaði fyri vinningin.
- 20.000 krónur fyri jól - tað er ikki so galið, segði Dan Andreassen í Leirvík.
