Hóast Grafiski Verkstaður Føroya nú flytur í nýggj høli, er ongin vandi á ferð, tí verkstaðurin hevur sína egnu sál, heldur Kinna Poulsen, sum hevur fylgt arbeiðinum á verkstaðnum síðani byrjan Í dag klokkan 16 letur Grafiski Verkstaður Føroya alment upp í nýggju hølunum í søguligu Fabrikkini hjá Østrøm á Skálatrøð, eftir at hava húsast í Gundadali í 10 ár.
Í hesum sambandi hevur Kinna Poulsen eina longri hugleiðing í Sosialinum í dag, har hon lítur aftur á gandakendar løtur á verkstaðnum.
Eisini vísir hon á tann týdning, verkstaðurin hevur havt fyri listafólk, ið arbeiða við steinprenti og sum eitt stað, har føroysk og útlendsk listafólk hava samstarvað tvørtur um landamørk
- At hetta er framúr væl eydnað við íblástri til allar síður, kemst fyrst og fremst av teimum báðum, Jan Andersson og Fríðu Brekku, sum varða av verkstaðnum og teirra serliga evni at sameina yrkisliga professjonalismu og gestablídni, ið mong av listafólkunum hava verið takksom fyri, skrivar Kinna Poulsen.
Millum mongu listarligu hæddarpunktini á Verkstaðnum hesi 10 árini nevnir hon stóra prentið hjá Bjørn Nørgaard við heitinum ?Postkort fra Færøerne? og leggur afturat
- Skulu vit trúgva Bjørn Nørgaard er eingin vandi á ferð, nú verkstaðurin er fluttur. Hesin verkstaður hevur eina sál, sigur Nørgaard, men hon er fyrst og fremst kveikt av teimum menniskjum, sum hava teirra gongd á verkstaðnum, og sum við nýggju og betru hølisumstøðunum fara at hava enn betri høvi at kaga inn í verkstaðin og fylgja við í gandakendu tilgongdini, tá steinprent verða til.
Nú nýggju hølini verða sýnd fram í dag, verður eisini høvi at síggja eitt úrval av steinprentum, gjørd á verkstaðnum seinastu 10 árini.
