Sørvágur: - Vit vilja í øllum førum gera okkara til, at tónleikurin fær bestu umstøður at virka undir her í bygdini, sigur borgarstjórin, Jákup Suni Lauritsen við Sosialin.
Hetta er helst ein veruleiki sum tey tónleikahugaðu í Sørvági munnu fegnast um og hava longst eftir.
Í løtuni er støðan hon, at Musikkskúlin húsast í ymiskum hølum í skúlanum í bygdini. Men nú skal altso ein broyting koma í.
Ætlanin er at byggja ein sera snotuligan musikkskúla, sum fer at geva tónleikinum tær allarbestu umstøðurnar í framtíðini.
Sambært verkætlanini skal tann gamli skúlin brúkast til endamálið, eins og ein annar bygningurin skal byggjast fastur í henda.
Gávu
Sum nevnt, er nú klárt at fara undir at grava út fyri útbygninginum. Væntandi fer kostnaðurin av verkætlanini at kosta umleið 2,4 mió krónur.
Sum skilst á fólki, má hetta helst metast sum eitt eindømi, at ein kommuna í slíkari stødd gevur tónleikinum í bygdini so góðar umstøður at húsast undir.
Ein nevnd hevur arbeitt við hesi skúlaætlanini, í tøttum samstarvi við arkitektin Jákup á Stongunum.
Sambært borgarstjóranum er ein komin til eitt sera gott úrslit.
- Ætlanin er, at skúlin skal kunna takast í nýtslu komandi ár, sigur Jákup Suni Lauritsen.
Nevnast kann, at í fjør lat kommunan eina rættiliga stóra upphædd til Sørvágs Tónleikarafelag at keypa útgerð fyri.
Hetta hendi í sambandi við, at fimmti ár vóru liðin síðani felagið varð stovnað.
