Gátuføru menninir, sum síggjast í rútunum til vinstru á viðheftu mynd, eru bert sæddir á vakmyndatólinum tann dagin, tá Anne-Elisabeth Hagen hvarv. Vakmyndatólið, sum fekk hesar upptøkur um morgunin hin 31. oktober í fjør, stendur við arbeiðsplássið hjá manni hennara, ríkmanninum, Tom Hagen.
Hesir menninir – róptir ”telefon-maðurin” og ”keppa-maðurin” – hava ongantíð givið seg til kennar hjá løgregluni, tó at tað nú eru nógvar vikur, síðan løgreglan kunngjørdi vakmyndirnar. Tommy Brøske, kanningarleiðari, segði í norskum miðlum í dag, at løgreglan hevur avdúkað fleiri ”handlingar”, sum kunnu knýtast til eina møguliga ætlan um rán.
- Vit hava einki sæð til hesar menn, sum vóru á vakmyndatólinum henda morgunin, hvørki fyri ella eftir, at Anne-Elisabeth Hagen hvarv, sigur kanningarleiðarin og leggur aftrat, at løgreglan hevur nógv vakmynda-tilfar, men hevur higartil ikki funnið aðrar myndir av hesum báðum monnunum, telefonmanninum og keppamanninum.
Løgreglan veit tískil ikki, hvørjir hesir menninir eru, sum komu á vakmyndatólið tíðliga um morgunin hin 31. oktober í fjør - sama morgun, sum Anne-Elisabeth Hagen hvarv úr húsunum í Lørenskog.
Norska løgreglan arbeiðir við nógvum ymiskum møguleikum um, hvat kann vera hent ríkmanskonuni, men høvuðsástøðið er framvegis, at konan er rænd úr heiminum í Lørenskog. Eitt ástøðið er, at menninir, sum eru á vakmyndunum, hava hildið vakt yvir arbeiðsplássinum hjá miljarderinum, Tom Hagen, meðan kona hansara varð rænd.
Seinastu tíðina hevur norska løgreglan havt tekniska hjálp til at nágreina nevndu vakmyndaupptøkur, og her er eitt nú staðfest við vissu, at talan er um tveir ymiskar menn. Serfrøðingarnir hava eisini staðfest hæddina á báðum monnunum.
Klokkan 07.36 er sonevndi keppa-maðurin á vakmyndatólinum, og hesin er millum 180 og 188 sentimetrar høgur. Klokkan 08.00 er telefon-maðurin á vakmyndatólinum. Hesin er í hettu og verður mettur at vera millum 176 og 182 sentimetrar høgur.
Hvørgin maðurin hevur givið seg til kennar hjá norsku løgregluni, og tað heldur Tommy Brøske, kanningarleiðari, vera løgið, tá hugsað verður um tað fokus, sum hevur verið um júst hesar vakmyndir. Hann heldur eisini, at menninir vísa løgna atferð á upptøkunum.
Á eini aðrari vakmyndaupptøku er ein, sum súkklar, og sum eisini varð eftirlýstur, og hesin vendi sær til løgregluna bara tveir dagar eftir eftirlýsingina, men løgreglan hevur ongantíð frætt frá hinum báðum, sigur kanningarleiðarin, Tommy Brøske.
