Landskassin
Seinasta gjøgnumgongdin av fíggjarstøðuni hjá landskassanum vísir, at nettostøðan er góð.
Soleiðis byrjar Landsbankin seinastu frágreiðing sína, sum er at finna á www.landsbankin.fo.
Víst verður á, at nettoognin hjá landinum í dag er 101 mió kr., sum svarar til 1% av bruttotjóðarúrtøkuni. Fyri tíggju árum síðani var talan um eina nettoskuld, sum svaraði til 75% av BTÚ.
Samstundis er bruttolánaskuldi minkað úr 113% í 35% av BTÚ. Bæði tí skuldin sjálv er minkað, og tí talan eisini hevur verið um ein munandi vøkstur í BTÚ.
Gjaldføra ogn landskassans var í 1996 16% av BTÚ. Hon var mest í 2002, tá hon svaraði til 29% av BTÚ, og er síðan minkað til 17% av BTÚ í 2005. Gjaldføra ognin er neyðug fyri at landið kann rinda skyldur sínar rættstundis og er tí eisini neyðug fyri at tryggja landsins lánføri.
