Ímeðan meginparturin av føroya fólki vendir eyguni ímóti Havnini og teimum mongu steypafinalunum í fótbólti, venda flesta róðrarfólk andlitunum ímóti Hvannasundi, har fyrsta umfar í Ódnartøkum var avgreitt. Veðrið var av tí besta tá rógvararnir settust við árarnar og umstøðurnar somuleiðis sera góðar at rógva í.
Fyrsti riðil var við 5-mannaførum kvinnum, 6-mannaførum kvinnum og barnaróðri dreingjum.
Raðfylgjan á bátunum var tann sama allar nýggju róðrarnar, har Drekin vann alt hjá dreingjunum, Teistin alt í 5-mannaførunum og Sundabáturin alt í 6-mannaførunum. Merkisvert var at Sundabáturin vann sannførandi, við næstan einari bátslongd í øllum róðrunum.
Í øðrum riðili var sama søga har sami vinnari var í øllum nýggju róðrunum. Her róðu 6-mannafør menn, 8-mannafør og barnaróður gentur. Hjá gentunum vann Havfrúgvin alt, í 6-mannaførunum vann Rádni og í 8-mannaførum vann Knørrur alt. Her var frástøðan so at siga tann sama í øllum róðrum.
Í síðsta riðilinum róðu 5-mannafør við gentum, 5-mannafør við dreingjum og 10-mannafør. Aftur her var raðfylgjan so at siga tann sama í hvørjum róðri. Falkur vann alt hjá gentunum, Kollur var fremstur hjá dreingjunum og Klaksvíkskingur vann alt í 10-mannaførunum. Eins og í ársins FM róðrum var sera tætt í 10-mannaførunum, har allir bátarnir komu á mál, innanfyri eitt sekund í øllum róðrunum.
Samanumtiki var spenningurin um raðfylgjuna á bátunum ikki tann heilt stóri. Í flestu róðrunum var raðfylgjan tann samað. Hóast hetta er Ódnartøk altíð stuttligt og spennandi hjá áskoðarum eins og rógvarum, tí sjáldan verður kappróður sæddur frá eini so brestbúnari síðu sum í Ódnartøkunum.
Annað og triðja umfar vera ávíkavist í Miðvági 10. september og í Runavík 24. september.
In.fo fylgir róðrunum.
