Samstundis sum amerikanarar fyrireika seg til at reka irakska forsetan, Saddam Hussein, frá, hevur ísraelski forsætisráðharrin, Ariel Sharon, kunngjørt, at hann ætlar sær at geva palestinska leiðaranum, Yasser Arafat, somu lagnu.
- Tann nýggja stjórnin fær eina trupla uppgávu, og tað er bardagin ímóti yvirgangi og leiðaranum hjá palestinsku sjálvsstýrismyndugleikunum, segði Sharon um vikuskiftið. Hann legði afturat, at fáa palestinar eina nýggja leiðslu, fer tað at bera til at tosa um frið við teir.
Ísraelska blaðið Yediot Aharonot skrivaði í gjár, at amerikanski forsetin, George W. Bush, tekur undir við ætlanini hjá Sharon. Teir báðir eru á einum máli um, at fyrst skal Saddam Hussein fáast burtur, og at síðani eigur Arafat tørn, skrivaði blaðið.
- Vit fara at reka Arafat burtur, og amerikanarar hava sagt, at teir taka undir við tí. Hvítu Húsini meta ikki Arafat øðrvísi enn Saddam Hussein. Hvør er verri enn annar, skrivaði Yediot Aharonot frá tí, sum blaðið kallar týðandi ísraelskar keldur.
Ísraelskir og amerikanskir embætismenn hava leingi sagt, at Arafat eigur at fara frá, men hesum kravi hava teir palestinsku sjálvstýrismyndugleikarnir víst aftur. Teir vísa á, at tað palestinska fólkið hevur valt Arafat til leiðara, og at tað eru einans palestinar, sum kunnu gera av, hvør skal vera teirra leiðari.
