Fyrrverandi bretski prinsurin Andrew, sum nú hevur borgarliga navnið Andrew Mountbatten-Windsor, varð í morgun handtikin í einum máli um embætismisnýtslu.
Tað sigur løgreglan í eini fráboðan sambært fleiri bretskum miðlum eitt nú BBC.
Løgreglan nevndi ikki navnið á fyrrverandi prinsinum.
– Eftir eina gjølla meting hava vit nú sett í verk eina kanning av hesum illgrunanum um misnýtslu av embætinum, sigur varaløgregluovastin Oliver Wright í eini fráboðan sambært miðlinum.
Sambært fráboðanini frá løgregluni í Thames Valley er maðurin handtikin undir illgruna fyri misnýtslu av embætinum og er í varðhaldi hjá løgregluni.
Samstundis verður upplýst, at rannsakanir eru framdar á adressum í Berkshire og Norfolk.
Fyrrverandi prinsurin er handtikin á sínum 66 ára føðingardegi.
Fyrr á degnum vísti The Telegraph myndir av tí, sum hildið verður at vera fleiri løgreglubilar uttanfyri heimið hjá Mountbatten-Windsor.
Handtøkan kemur eftir at løgreglan í Thames Valley í síðstu viku segði, at hon kannaði illgruna um, at fyrrverandi prinsurin gav trúnaðarskjøl til nú deyða kynsbrotsmannin Jeffrey Epstein.
Umfangið av sambandinum hjá fyrrverandi prinsinum við Epstein er vorðið greiðari, nú amerikanska rættarmálaráðið hevur latið út fleiri enn tríggjar milliónir skjøl úr Epstein-fílunum.
Skráirnar eru eitt ómetaliga stórt savn av skjølum, myndum og videobrotum, sum eru savnað undir kanningini av dømda kynsbrotsmanninum og fíggjarmanninum Jeffrey Epstein og netverki hansara.
Í nýggjastu skjølunum, sum eru givin út, gav ein sendari, sum sambært BBC verður hildin at vera fyrrverandi prinsurin, víðari fráboðanir um embætisvitjanir í Singapore, Hong Kong og Vietnam, meðan hann var handilssendimaður.
Hann er eisini undir illgruna fyri at hava latið trúnaðarupplýsingar víðari um íløgumøguleikar.
/Ritzau/
