Nógv tiltøk plaga at vera fastur táttur í jólahaldinum í miðbýnum í Havn.
Høvi verða hjá fólki og feløgum at selja alskyns mat, jólaprýði, heimabakstur, blómur, jólatrø, bøkur, klæðir og mangt annað. Tað er bert hugflogið, sum setir mark. Tó krevst eitt søluloyvi frá Tórshavnar kommunu. Søkjast kann um loyvi við sjálvavgreiðslu á heimasíðuni hjá kommununi ella við at fylla út oyðublað, ið fæst frá Snarskivuni.
Eisini tey, ið hava hug at hugna um miðbýin í jólamánaðinum, skulu boða kommununi frá hesum, t.v.s. øll, ið ynskja at syngja, framføra okkurt ella hava onkra framsýning, skulu siga frá hjá kommununi, so teirra tiltak kann gerast partur av skránni fyri »Jól í miðbýnum«. Søkjast kann um luttøku á jol@torshavn.fo ella á www.torshavn.fo.
Sum vant verður nógv gjørt burturúr í miðbýnum jólamánaðin, og í ár eru fleiri nýggj tiltøk á skránni. Allar jólasmátturnar verða umskapaðar til ein lívligan jólamarknað við nógvum úrvali av jólaprýði, mati, upplivingum og framsýningum.
Tá stóra jólatræið á Vaglinum verður tendrað leygardagin 27. november fær miðbýurin vitjan av jólamonnum og vættrum, brandbilinum, stigabilinum eins og kórsangur fer at ljóma.
Jólasøla verður oman eftir gongugøtuni og aðra staðni í miðbýnum - og borgarstjórin heldur røðu.
