Nú ber aftur til hjá føroyskum børnum í Danmark at fáa undirvísing í føroyskum.
Føroyski skúlin í Danmark er í Føroyahúsinum hvønn fríggjadag seinnapart og hann fylgir vanliga álmanakkanum hjá donskum skúlum.,
Frálæra í føroyskum verður aftur í Føroya húsinum í Keypmannahavn í heyst og vetur og í løtuni ganga 21 næmingar frá 1.-9. flokk á skúlanum. Men pláss er fyri enn fleiri. Tað er bara at møta upp og bæði undirvísing og undirvísingartilfar eru ókeypis, sigur lærarin, Sanna Vitalis.
- Føroysk foreldur aftra seg ofta at flyta heim, tí børnini ikki eru so stinn í føroyskum, heldur hon.
- Foreldrini stúra fyri, at vantandi kunnleiki til føroyskt ger, at børnini kanska ikki fara at trívast í einum føroyskum skúla og óivað er tað so, at betri børnini eru fyri málsliga, minni orsøk hava foreldrini við at himprast við at flyta heim aftur til Føroyar.
