Fólkaflokkurin og Sambandsflokkurin taka ikki undir við tiltøkunum, sum landsstýrið ætlar at seta í verk ímóti Russlandi. Men tað er Miðflokkurin.
Jenis av Rana váttar fyri in.fo, at Miðflokkurin er við.
– Eg síggi hetta sum eitt kompromis. Eg kundi sjálvandi sagt, at annaðhvørt fáa vit alt ella einki. Men vit hava valt at vera við, tí hetta er eitt stig á vegnum, sigur Jenis av Rana.
Tað júst fyri at steðga Jenis av Rana, at Løgtingið tann 6. mai í fjør samtykti, at einki kundi broytast í Russlandssáttmálanum, um tað ikki fyrst varð samtykt í Løgtinginum. Ein avgerð, sum nú verður broytt við lógaruppskoti, sum Løgtingið fer at viðgera seinnapartin.
Jenis av Rana sigur, at um semja var um tað í landsstýrinum í fjør, so kundi hevði hann havt sett strangari tiltøk í verk, men hesum steðgaði Løgtingið, og tað vóru samgongufólk, sum vildu hava seta samtyktina júst fyri at forða Jenisi av Rana sum landsstýrismanni at gera tað.
– Eg hevði í øllum førum gjørt mítt til at steðga russiska piratfiskiskapinum eftir kongafiski í Irmingarhavinum, men tað slapp eg heldur ikki, sigur hann.
Uttanríkisráðið hevur boðað fjølmiðlunum á tíðindafund á Viðareiði klokkan 10:15, har tiltøkini verða kunngjørd. Saman við Høgna Hoydal verða eisini Aksel V. Johannesen og Ruth Vang, forfólk í Javnaðarflokkinum og Framsókn.