Herfyri varð ein gomul sjófartsbók funnin millum skins og hold í Vestmanna, og henda bók er heilt frá 1928 - og soleiðis skjótt 90 ára gomul.
Søgan er, at eitt ungt par hevur keypt eini gomul hús í Vestmanna, sum tey eru í holt við at seta í stand. Í arbeiðnum at taka veggir og annað niður, kom ein gomul sjófartsbók undan kavi millum skins og hold í húsunum.
Í bókini stendur navnið Poul Olaus Johan Danielsen, Húsavík, føddur 8. juli í 1907. Fyrsti túrur, sum Poul Jóhan er skrásettur fyri í bókini, er við Heimdal úr Vági, sum fiskar undir Íslandi í 1925. Annar túrur er við skipinum Regina úr Vági í 1926, og árið eftir er hann eisini við Reginu.
Hin 5. mars í 1928 mynstrar Poul Johan við skipinum Flower of the Forest úr Vestmanna. Skipari hendan túrin er Joen (Jógvan) S. Durhuus í Vestmanna. Tað var eingin annar enn hesin Joen (Jógvan), sum bygdi húsini í Vestmanna, har sjófartsbókin nú er funnin.
Eingin veit, hví sjófartsbókin hjá húsvíkinginum, sum var dekkari umborð á Flower of the Forest, er endað í Vestmanna og í húsunum hjá skiparanum.
Hin 5. mars í ár - ella um nakrar fáar vikur - eru 90 ár liðin, síðan Poul Johan mynstraði við Flower of the Forest. Um hann nakrantíð vitjaði heima hjá skiparanum í Vestmanna, ella um hann bara hevur gloymt bókina eftir umborð, og skiparin síðan hevur tikið hana heim við - ja, tað er eisini púrasta ógreitt.
Abbasonur henda húsvíking, sum átti sjófartsbókina, er trúboðarin, Poul Jóhan Djurhuus, sum býr á Skálafjørðinum. Eyðvitað er trúboðarin uppkallaður eftir abbanum.
Unga parið í Vestmanna, sum í dag eigur gomlu og umrøddu húsini, hevur latið abbasoninum sjófartsbókina, nú 90 ár eftir, at bókin onkusvegna endaði millum skins og hold í Vestmanna.
