Fróðskaparsetur Føroya skal nú eftirmetast av eini uttanhýsis serfrøðinganevnd, sum Bjørn Kalsø, landsstýrismaður í mentamálum, hevur sett.
Eftir ætlan skal eftirmetingin vera liðug um eitt ár.
Serfrøðinganevndin hitti landsstýrismannin á fundi mánadagin, og í gjár var nevndin á vitjað á øllum deildum á Fróðskaparsetrinum.
Tey, ið manna serfrøðinganevndina eru: Linda Nielsen, professari, dr.jur. Københavns Universitet, Jón Torfi Jónasson, professari, PhD. Háskóli Íslands, vinstrumegin og Jürg Glauser, professari, University of Zürich, ytst til høgru.
Næstytst vinstrumegin stendur Bjørn Kalsø, landsstýrismaður í mentamálum.
Serfrøðingarnir skulu meta um virksemið á Fróðskaparsetrinum í síni heild. Tey fáa fríar teymar at meta um øki, tey sjálvi halda hava týdning fyri ein útbúgvingar- og granskingarstovn, sum skal virka á altjóða støði.
- Endamálið við eftirmetingini er, at Fróðskaparsetrið fær altjóða viðurnenning og at vit gerast partur av Bologna-avtaluni, sigur Bjørn Kalsø, landsstýrismaður.
Hetta er fyrstu ferð nakrantíð, at ein slík uttanhýsis eftirmeting verður gjørd og hon verður gjørd í samstarvi við leiðsluna á Fróðskaparsetrinum, sigur Bjørn Kalsø
