Liberali flokkurin Framsókn kom í eina pínliga tvístøðu, tá eini meiriluti av tingfólkum floksins feldi uppskotið hjá landsstýrismanni floksins um fría fosturtøku í Føroyum.
Var tað ikki fyri hesi tingfólkin í einasta flokki á tingi, ið beinleiðis sigur seg gera fyri fríari fosturtøku, so var frí fosturtøka í Føroyum. Men tað er tað ikki, tí at Sólvit Nolsø og Hanna Jensen atkvøddu ímóti uppskotinum.
Á ársfundinum hjá flokkinum kom forkvinnan eisini inn á hetta evnið.
– Vit koma ikki uttanum, at tað einstaka málið, sum hevur fylt allarmest seinasta árið – heilt víst innanfloks, men eisini úteftir, – er fosturtøkumálið.
– Sum so ofta í truplum støðum, er málið meiri samansett, og tað eru fleiri løg í málinum, enn tey sum eru sjónlig úteftir, men tað sum stendur eftir er, at meirilutin av okkara egna tingbólki feldi eitt uppskot um eina nýggja fosturtøkulóg, segð Ruth Vang og helt fram:
– Eitt uppskot, sum okkara egni landsstýrismaður legði fyri tingið.
– Eitt uppskot, sum tók fyrilit hendan og handan vegin, men sum staðfesti, at innan fyri 12 vikur av viðgongutíðini eigur kvinnan sum er við barn endaligu avgerðina um eina møguliga fosturtøku.
– Eitt uppskot, sum er í tráð við tað, sum vit sum flokkur til tvey tey seinastu løgtingsvalini hava sagt okkum standa fyri, segði hon.
– Vit hava skuffað nógvar veljarar og tað hevur skatt álitið á flokkin.
– Vit mugu staðfesta, at arbeiðið innanfloks og tær royndir at finna semju um málið hevur ikki verið nóg væl grundað. Eiheldur eru nóg greiðar avtalur gjørdar við tey valevni, sum frammanundan hava gjørt vart við sítt fyrivarni í júst hesum máli, segði hon.
Hon segði eisini, at tey ikki eru samd og hava ikki funnið semju innanhýsis, sum gevur orsøk til at leggja málið fram av nýggjum í hesum valskeiðnum.
– Nevndin hevur tikið avleiðingina av tí, og tað er nú orðaður ein politikkur, sum nágreinar hvat flokkurin stendur fyri. Soleiðis, at valevni og veljarar hava nakað meiri ítøkiligt at fyrihalda seg til frá komandi løgtingsvali, og at vit tryggja, at tað er samsvar ímillum fatanina hjá valevnum og veljarum.
– Tit kenna helst orðingina, men eg skal endurtaka hana:
– Ein nýggj fosturtøkulóg skal viðurkenna, at fosturtøkuspurningurin er ein etisk tvístøða millum sjálvsavgerðarrættin hjá kvinnuni og rættin til lív hjá fostrinum.
– Framsókn vil, at lógin skal virka tálmandi á tann hátt, at kvinnan skal hava í boði neyðuga ráðgeving, sum skal tryggja, at avgerðin um fosturtøku fer fram á upplýstum grundarlag, er umhugsað og sjálvboðin. Vit síggja fyri okkum, at tað fyrst og fremst er kommunulæknin, sum metir um, í hvønn mun ráðgeving er neyðug.
– Kvinnan, sum er við barn, eigur endaligu avgerðina til og við 12. viku.
– Lóggáva og sosialar skipanir skulu virka soleiðis, at sosialar umstøður v.m. í minst møguligan mun ávirka fosturtøkutalið.
Hon segði, at tey hva viðgjørt málið á fleiri limafundum, umframt at tað er samskift í innanhýsis bólkum á sosialum miðlum.
Hetta málið skapar óró og vekir sterkar kenslur í øllum framsóknarhópinum, ikki minst hjá okkum sum eru virkin í landspolitikkinum. Eg haldi tó, at eg vegna okkum 5 í ting- og landsstýrismanningini kann siga, at vit eru samd um, at hetta í minst møguligan mun nskal órógva okkum í arbeiðinum við øðrum málum sum hava stóran týdning, segði Ruth Vang.
Út frá hesum ber til at staðfesta, at tey í Framsókn, sum eru ímóti fríari fosturtøku, ikki hava broytt støðu, og at uppskotið tí ikki verður lagt fyri tingið aftur í hesum valskeiði.
Spurningurin er so, um Hanna Jensen og Sólvit Nolsø kunnu stilla upp fyri Framsókn eftir næsta val, tá tey ganga ímóti stevnu floksins.
Hinvegin kann staðfestast, at frí fosturtøka í Føroyum og skotin langt fram í tíðina. Alt bendir á, at sitandi samgonga missir valdið á næsta løgtingsvalið. Andstøðan er øll sum hon er samd um, at fosturtøkulógin ikki skal broytast
