Forsetin í afrikanska landinum, Niger, sum kallast Mohamed Bazoum, heitir nú á heimssamfelagið um at hjálpa til við at fáa valdu stjórnina í landinum aftur til valdið.
Herurin í Niger tók í endanum av juli valdið í landinum og rak valda forsetan frá, og nú er tað leiðarin fyri trygdardeildunum í landinum, sum situr við valdinum.
Útlendskir miðlar halda, at Mohamed Bazoum nú situr í varðhaldi á forsetaborgini.
Seint í gjár hevði Washington Post ein kronikk, sum frákoyrdi forsetin í Niger stendur fyri at hava skrivað.
Her heitir hann beinleiðis á amerikanskar myndugleikar og heimssamfelagið annars um at hjálpa til við, at landaskil aftur verður í Niger.
Í kronikkinum sigur frákoyrdi forsetin, at landið kann fella í russiskar hendur við Wagner-bólkinum og vísir til harðrendu framferðina hjá Wagner í Ukraina.
Seint í gjár boðaði nýggja hernaðarstýrið í Niger eisini frá, at teir siga upp hernaðarsamstørv við Frakland, sum hevur fleiri herfólk í Niger.
Niger var annars eitt franskt hjáland, áðrenn landið fekk sjálvræði.
##med2##
Tað er maðurin, sum var leiðari fyri trygdardeildunum hjá valda forsetanum, sum nú hevur valdið í Niger.
Mikudagin í hesi vikuni var ein sendinevnd hjá vesturafrikanska samstarvsfelagsskapinum, Ecowas, í Niger.
Felagsskapurin hevur sett revsitiltøk í verk móti Niger og krevur, at valdi forsetin, Mohamed Bazoum, fær valdið í landinum aftur.
