Leiðarin á Føroya Listasavni, Helgi Fossadal, noktar at lova fólki inn í listaverkið »Bládýpið«, sum hann heldur hoyrir heima úti á keiini millum aðrar bingjur - Eg lati ikki bingjuna upp, eg greiða svarið, gestir á Føroya Listasavni fáa frá leiðaranum Helga Fossadal, tá tey spyrja um loyvi at sleppa inn at síggja listaverkið »Bládýpið« hjá Tróndi Patursson.
Sjálvur skilur listamaðurin onki.
- Eg havi latið Listasavninum »Bládýpi« sum gávu og handað leiðaranum lyklarnar. Har fylgdi eisini ein skrivlig avtala við, sum sigur, at gestir skulu hava atgongd til listaverkið, sigur Tróndur Patursson.
Leiðarin á Listasavninum sigur seg onki kenna til eina slíka avtalu, og hann metir heldur ikki, at »Bládýpið« hoyrir heima á Listasavninum.
- Eftir mínum tykki skuldi bingjan verið koyrd út á keiina, har hon hóskar betri millum hinar bingjurnar, sigur Helgi Fossadal, sum ikki rættiliga vil fyrihalda seg til, at »Bládypið« er eitt listaverk og ikki bara ein bingja.
Tað hava fólk í listaheiminum uttanlands hinvegin eina greiða meining um.
Eitt nú er sama listaverk størsta listarliga attraktiónin á Randers Kunstmuseum, eins og útgávan av verkinum, sum stendur á Bryggjuni í Keypmannahavn er sera væl umtókt.
Eisini fekk Tróndur Patursson í gjár ein fyrispurning úr Hollandi, um at lána »Bládýpið« út til listarligu heimsframsýningina, sonevndu Bienaluna í 2011.
