ARBEIÐSMARKNAÐUR
Í mars fekk Postfelag Føroya nýggjan formann, ella rættari forkvinnu, tá Heidi Biskopstø í Klaksvík setti seg í formannstólin. Hon er eitt sindur bilsin yvir atfinningarnar hjá tveimum kvinnum á Postverkinum, sum halda, at Postfelagið sjálvt hevur eina stóra skyld í niðurskerjingunum á Postverkinum, sum fyri tveimum vikum síðani førdi til, at 15 fólk vórðu søgd úr starvi.
- Eg haldi, at mátin sum samskiftið millum leiðsluna á Postverkinum og okkum fer fram uppá, er skeivur. Ístaðin fyri at kalla okkum inn sum felag fyri at tosa um broytingar á stovninum, verða hesar lagdar fram á starvsfólkafundi, sigur Heidi Biskopstø.
Hvat er trupulleikin í tí?
- Tá ætlanir eru um at gera so týðandi broytingar, mugu vit sum felag kunna krevja at verða kunnaði fyrst, sigur nýggja forkvinnan í Postfelagnum, men leggur dent á, at felagið sjálvandi ynskir at samstarva við leiðsluna.
- Vit ynskja eisini, at tað skal gangast væl hjá Postverkinum, sigur Heidi Biskopsstø.
Hvat sigur tú til atfinningarnar um, at tit bara duga at siga nei og einans røkja áhugamálini hjá postboðunum?
- Tað passar ikki. Sum felag arbeiða vit fyri allar limirnar. Eitt dømi um tað er, at tað kemur ein donsk fakfelagskvinna frá HK at greiða frá, hvussu tey kláraðu broytingarnar í danska postverkinum, tá hetta varð prisvatiserað. Hendan kvinnan tekur sær júst av teimum, sum arbeiða innan skrivstovuyrkið í Post Danmark, sigur Heidi Biskopstø, sum í dag skuldi koma aftur av arbeiðsferð í Danmark, har hon hevur hitt onnur umboð fyri norðurlendsk systirfakfeløg.
