Føroyingaliðini endaðu í ongamannalandi

Stóra søgan í íslendskum fótbólti í dag er, at Knattspyrnufelagið Víkingur úr Reykjavík er íslendskur meistari fyri fyrstu ferð síðani 1991. 

Undan seinasta umfarinum var Víkingur eitt stig frammanfyri Breiðablik. Víkingur vann á heimavølli 2-0 á Leiknir við tveimum málum, ið vóru skotin í fyrra hálvleiki.

Breiðablik vann 3-0 á HK á heimavølli, men teir máttu taka til takkar við silvurkrónunum. Víkingur endaði á 48 stigum og Breiðablik á 47 stigum. 

Víkingur hevur eisini vunnið seg í hálvfinaluna í steypakappingini, og stendur við einum góðum møguleika at vinna greipuna.

Talan er um sætta meistaraheiti í søguni hjá Víkingi Reykjavík.

Føroyingaliðini, Valur og FH endaðu í ongamannalandi.

Gunnar Nielsen vardi málið hjá FH, ið spældi javnleik 2-2 móti KA á Akureyri.

Kaj Leo í Bartalsstovu slapp ikki á vøllin tá lið hansara, Valur vann stórsigur 6-0 á Fylkir á útivølli.

Kaj Leo sleppur ikki at halda fram í Vali. Umboðsmaður hansara, Hans Jákup á Líknargøtu sigur við fotbolti.net, at Kaj Leo ynskir at halda fram í bestu íslendsku fótbóltsdeildini, og nú verður arbeitt við at finna eitt felag til Kaj Leo til komandi kappingarár.

Kaj Leo hevur fingið spælitíð í 14 dystum hjá Vali hetta kappingarárið, og hann hevur skotið trý mál í hesum 14 dystunum. 

Fram og ÍBV flyta upp í Pepsideildina til komandi kappingarár.

Endaliga støðan í Pepsideildini 2021: