Janus Dam Djurhuus, Dánjal Ragnarsson og liðfelagarnir í ÍBV vunnu seg í kvøld í hálvfinalurnar í endaspælinum í bestu íslendsku hondbóltsdeildini.
ÍBV vann í kvøld seinnu fjórðingsfinaluna á Stjörnuni, ið var leikt í Garðabær.
Tað stóð einki til hjá ÍBV í fyrra hálvleiki. Í steðginum var Stjarnan á odda 15-10.
Við einum góðum avriki í seinna hálvleiki eydnaðist tað ÍBV at vinna dystin 27-23. Fyrru fjórðingsfinaluna úti í Heimey vann ÍBV 37-33 (21-17). Sostatt gjørdist talan um ein samlaðan 2-0 fjórðingsfinalusigur.
Janus skoraði fýra mál. Dánjal kom ikki á máltalvuna í kvøld, men legði upp til tvey mál.
