Tað eydnaðist ikki føroyska U19 kvinnulandsliðnum í flogbólti at spæla seg í hálvfinaluna í NEVZA-kappingini í morgun; til tað var íslendska liðið alt ov sterkt. Ístaðin skulu Føroyar spæla um 5. plássið ímóti Onglandi í sunnumorgunin.
Ísland legði fyri sum eitt óløgi og fór framum 8-2 og 17-8, áðrenn settið var vunnið 25-12.
Fyrsta løtan í øðrum setti var tann frægasta hjá Føroyum, sum vóru á odda 12-11, áðrenn Ísland dró frá og vann 25-18.
Triðja settið minti um tað fyrsta, og Ísland legði seg á odda 7-2, og so var spurningurin meira um hvussu stórur, munurin skuldi verða; hann varð upp á 9: 25-16.
Tapið merkir, at Føroyar sunnumorgunin kl. 10 skulu spæla um 5. plássið í kappingini ímóti Onglandi, sum tapti sína fjórðingsfinalu 0-3 (20-25, 24-26, 17-25) ímóti Noregi.
Dysturin ímóti Onglandi kann gerast bæði stuttligur og spennandi, tí tað er serliga ímóti Onglandi, at Føroyar hava vunnið sínar flestu sigrar í hesi kapping, men seinasta ár var Ongland við yvirlutan og vann tvær ferðir á Føroyum. Fyrst í bólkaspælinum og síðani tá spælt varð um plaseringarnar frá nr. fimm til sjey. Í báðum førum vóru dystirnir fimmsettarar, har Føroyar taptu 15-11 og 16-14 í fimta setti.
Slíkir ósigrar taka fast, og hetta ætla føroysku kvinnurnar skal ikki henda aftur á hesum sinni. Serliga ikki á heimavølli.
Flogbóltssamband Føroya
