Nýliga endurstovnaði umhvørvisfelagsskapurin, FNU, ella Føroya Náttúruverndarfelag, sigur á Rás2 í dag, at politikararnir ikki taka umhvørvistrupulleikarnar í nóg stórum álvara.
Umhvørvisráðstevnur hjá Sameindu Tjóðum – ST – hava verið nógvar í tali, og tann næsta – COP21, fer av bakkastokki nú sunnudagin. Niðurstøðurnar vera ógvusligari ár fyri ár, og FNU, sigur eisini, at umhvørvistrupulleikarnir gera um seg í Føroyum.
- Í Føroyum kenna vit til, at tað hevur verið rópt varskó, tá ið SEV hevur gjørt stór inntriv í føroysku náttúruna og tikið burtur áirnar. Tá ið vit tosa um dálking, so er tað serliga tann stóri fiskiflotin, sum dálkar øðiliga illa, sigur Theresa Jákupsdóttir úr nevndini hjá FNU.
Hóast trupulleikarnir eiga at vera komnir til lívs, so halda tey úr FNU ikki, at politiska skipanin ger nóg nógv at minka um CO2 útláti í Føroyum.
- Vit noyðast hava eina politiska stýring, fyri at gera okkurt við hetta. Men politikarirnir tykjast vera bangnir at arbeiða fyri at gera okkurt við støðuna, sigur Theresa.
Altjóða trupulleikar
- Tað er serliga materiella forbrúksmentanin, sum dálkar øðiliga illa. Matur og aðrar keypsvørur verða innfluttar og hópframleiddar í stórum nøgdum, og hóast tær kanska ikki beinleiðis dálka umhvørvi í Føroyum, so dálkar hetta aðrastaðni. Umhvørvistrupulleikarnir raka allan heimin, og vit eru øll partur av tí størru vistskipanini, sigur Theresa Jákupsdóttir.
Umhvørvistrupulleikarnir verða settir á dagsskrá í kvøld, tá ið FNU skipar fyri kunnandi tiltaki í Skúlanum í Leirvík kl 19.
Trýst á pílin undir myndini og hoyr alla samrøðuna við Theresu Jákupsdóttir og Sonnu Dahl úr FNU nevndini.
