##med2##
Tað skal vera javnt, og tað skal vera dramatiskt tá neistakvinnur og kyndilskvinnur spæla ein avgerandi dyst í Faxe Kondi kappingini ella í landskappingini.
Tað var heldur ikki nakað undantak í fyrru hálvfinaluni í høllini á Hálsi, har Neistin í kvøld var heimaliðið. Tó lá drama´ið ikki og lúrdi í steðginum. Tá var Kyndil á odda 12-8, men í seinna hálvleiki át Neistin leiðsluna upp hjá Kyndli, og endaði enntá at fara framum 25-24 áðrenn Kyndil javnaði til 25-25, ið gjørdist endaliga úrslitið av fyrru hálvfinaluni.
Tað seinasta sum hendi í dystinum var eitt fríkast sum Marjun F. Danberg skuldi taka fyri Neistan. Tíverri kom Marjun at raka Anju Eliasen hjá Kyndli í andlitið, og tað endaði við, at Marjun fekk blátt kort. Vandin fyri, at Neistin má vera roynda spælaran fyri uttan er tískil sera stórur.
Neistin-Kyndil 25-25 (8-12)
Toppskjúttar Neistin: Fríða á Dunga 10 og Marjun F. Danberg 5.
Toppskjúttar Kyndil: Nadia Pejovic 7 og Turið Arge Samuelsen 7.
Seinna hálvfinalan millum Kyndil og Neistan verður leikt leygarkvøldið 13. februar klokkan 20. FM1 sigur sjálvandi frá dystinum.
Endar tað á jøvnum aftur telja mál á útivølli dupult. T.v.s. at um dysturin endar 24-24 kemur Kyndil víðari, og endar dysturin 26-26 kemur Neistin víðari.
Á ljóðfíluni omanfyri ber til at hoyra frá FM1:
1) Hoyr Sjúrð H. Hoydal, frásøgumann hjá FM1 siga frá teimum seinastu dramatisku minuttunum í dystinum millum Neistan og Kyndil, ið endaði 25-25.
2) Hoyr samrøðuna Sjúrður gjørdi við Kára Horn, venjara hjá Neistanum sum viðgekk, at hann helt, at Kyndil hevði Neistan í sekkinum. Men Kári fegnast um, at Kyndil ikki bant fyri, og hann er fegin um hvussu neistakvinnur stríddi seg innaftur í dystin. Hann er tó harmur um, at hann allarhelst má vera Marjuna F. Danberg fyri uttan í returdystinum.
HER ber til at hoyra samrøðuna Sjúrður gjørdi við Kyndilsvenjaran, Dragan Brljevic.
