Eyðun Klakstein
Í ár verða kappingargreinarnar øktar í tali. Tað merkir at kappingin fer fram yvir tveir dagar, mótvegis seinnu árunum, tá alt hevur verið avgjørt eftir einum degi. Eisini hevur kappingarnevndin gjørt av, at FM verður opin kapping, soleiðis at øll kunnu vera við. Vand sum óvand. Tó er aldursmark ásett soleiðis, at bert tey, sum eru fødd í 1994 og fyrr, kunnu vera við.
Við at hava FM sum opna almenna kapping, vónar FÍF at fólk, ið vanliga ikki hava verið at sæð í frælsa ítróttinum, koma at royna seg. Vetrarítróttargreinarnar liggja stillar nú, og kundi hetta verið ein møguleiki hjá eitt nú hondbólts- og flogbóltsleikarum at royna síni evni. Kappróðrarárið endar nú, og væl er hugsandi at kappróðrarfólk í fullari venjing eisini tóku av.
Kappingarnar leygardagin verða:
100 metrar
400 metrar
800 metrar
5.000 metrar
Longdarlop
Hamarakast
Diskoskast
Kappingarnar sunnudagin verða:
100/110 metrar hekkurenning
200 metrar
1.500 metrar
3.000 metrar forðarenning
Hæddarlop
Spjótkast
Kúlustoyt
Tað eru nógv ár síðani at FM-kapping hevur verið í forðarenning, hæddarlopi og hekkurenning. Men hetta eru alt sera áskoðaravinarligar kappingar, og nú umstøður aftur eru til hesar greinar, verður spennandi at fylgja við.
Báðar dagarnar verður byjað kl. 14.00 og endað við spurtfinalum kl. 16.00. Endalig tíðarætlan saman við luttakaralistum verður løgd út á www.renn.fo fríggjadagin 5. oktober.
Oyggjaleikir eru næsta ár, og FM er sjálvandi gott høvi at klára úttøkukrøvini. Hesi eru at finna á heimasíðuni hjá FÍF undir úttøkukrøv.
12 nýggir dómarar vóru klaktir í vár, tá FÍF skipaði fyri dómaraskeiði. So tað verður eitt vælútbúgvið lið av dómarum sum saman við nútímans tíðtøkutøkni, sum kemur at avgreiða kappingarnar.
Tilmelding fer fram umvegis heimasíðuna hjá FÍF, sum eitur www.renn.fo. Tilmeldingin skal vera avgreidd innan midnátt mikukvøldið 4. august. Tað verður ikki møguligt at melda til eftir hetta. Luttøkugjaldið er kr. 50,- líkamikið hvussu nógvum kappingum kappast verður í.
