Flytingarvindeygað, sum er fýra vikur langa skotbráið, feløg hava til at keypa og selja spælarar mitt um summarið, liggur so óheppið fyri, at tað kann vera serstakliga óheppið fyri feløg, sum hava ungar spælarar, ið lúra eftir at sleppa niður at lesa.
– Sum er, letur flytingarvindeygað aftur 28. juli, men tey ungu, sum ætla sær niður at lesa, fáa ikki boð fyrr enn 30. juli. Vil illa til, kann eitt felag hava kanska tríggjar spælarar, sum fara avstað eftir ólavsøku, uttan at felagið hevur nakran møguleika at finna aðrar spælarar í staðin, sigur venjarin hjá B68, Bill McLeod Jacobsen.
Sjálvur hevur hann ikki henda trupulleika í ár, sjálvt um ein av hansara spælarum ætlandi fer niður at lesa. Tað er Poul N. Poulsen, men Bill sigur, at hóast hópurin hjá B68 kanska ikki er so breiður, hevur hann onkran at seta inn á plássið, Poul hevur røkt í landskappingini higartil.
– Men eg veit um onnur feløg, ið hava spælarar, ið ætla sær niður at lesa, so tað kann vera, at tað kemur illa við hjá onkrum av teimum, um tey ikki fáa handlað, tí flytingarvindeygað longu er latið aftur, sigur hann.
Verður eftirmett
Karl Vidtfeldt, formaður í kappingarnevndini hjá Fótbóltssambandinum, ásannar, at hetta kann geva summum feløgum ein trupulleika, men at tað tíverri ikki letur seg gera at broyta nakað í ár.
– Vit skulu í góðari tíð boða FIFA frá, nær okkara flytingarvindeygað er, so í ár broytist einki. Alla tíðina royna vit at taka hædd fyri teimum ymsu umstøðunum, ið ávirka, nær tað er best at hava flytingarvindeygað opið, men eg má viðganga, at henda trupulleikan hava vit ikki hugsað um, sigur hann.
– Men eg havi noterað mær hetta, so vit fara at taka tað upp, tá vit í heyst fara at eftirmeta hesa landskappingina, sum nú er í gongd. Er tað tá eitt ynski frá feløgunum um, at vit skulu flyta flytingarvindeygað, so tey ikki skulu brenna seg av, at spælarar møguliga sleppa inn at lesa niðri, vilja vit fegin gera tað og boða FIFA frá tí.
