Føroyska kvinnulandsliðið í flogbólti er farið til Luxembourg at spæla í EM-undankappingini fyri smátóðir, sum kappast 2013 CEV European Championship, og á ferðini eru tríggir dystir á skránni.
Tann fyrsti verður í annaðkvøld klokkan 19.30 ímóti Luxembourg, annar dysturin verður leygarkvøldið klokkan 19.30 ímóti San Marino og tann triði sunnudagin klokkan 14.30 ímóti Íslandi. Hetta eru føroyskar tíðir.
Tvey tey fremstu liðini í bólkinum koma víðari til eitt endaumfar, sum verður spælt í 2013, har spælt verður ímóti teimum báðum fremstu liðunum úr hinum undanbólkinum.
Til ferðina hevur landsliðsvenjarin, Magnus Aðalsteinson, tikið út hesar 12 spælarar:
Jastrið Sivertsen, Mjølnir
Urd Traðará, Mjølnir
Karin Mikkelsen, SÍ
Guðrið Syderbø, Fleyr
Sofía Purkhús, Mjølnir
Sólva Dimon, Brøndby VK
Eina Kalsø, Mjølnir
Margit Joensen, Mjølnir
Hjørdis Johannesen, Fleyr
Karina P. Debes, Gentofte Volley
Rakul Dalsgaard-Jakobsen, Fleyr
Helen á Lakjuni, ÍF
Umframt kvinnulandsliðið, er altjóða flogbóltsdómarin, Jan Hentze, við á ferðini og skal hann døma tveir dystir í kappingini. Leygardagin dømir hann Luxembourg-Ísland sum fyrstidómari og sunnudagin San Marino-Luxembourg sum annardómari.
