Talið av íbúgvum í Føroyum er seinastu árini voksið so mikið nógv, at íbúgvatalið nú nærkast 50.000. Tað vísa seinastu hagtølini hjá Hagstovu Føroya.
Í 2015 vaks fólkatalið í Føroyum nevniliga við 546 fólkum, so at tað 1. januar 2016 búðu 49.192 føroyingar í Føroyum.
Orsøkirnar til vøksturin eru tvinnar í 2015. Burðaravlopið, ið er munurin millum fødd og deyð, var 230 fólk, meðan nettotilflytingin, ið er munurin millum tilflyting og fráflyting, var 316 fólk.
Hagstova Føroya leggur tó dent á í teirra greining, at góða gongdin í fólkatalinum ikki skyldast burðaravlopinum, ið hevur verið fallandi síðstu árini, men heldur er orsøkin flytingin millum Føroyar og útlond, har tað serliga eru færri føroyingar, ið flyta av landinum.
