Talið á tannárinum og talið á pensjónistum, sum eru á føroyska arbeiðsmarknaðinum, er serliga stórt.
Tað vísir ein uppgerð hjá Hagstovuni.
Uppgerðin vísir, at talið á løntakarum hækkar alsamt, men at tað serliga eru tannáringar og pensjónistar, sum eru farin til arbeiðis.
Hagstovan vísir á, at í aldursbólkinum frá 20 til 54 ár, er lutfalsliga lítil vøkstur í talinum á løntakarunum við tað, at talan er um eina framgongd ímillum 0,6 prosent til 2,8 prosent.
Tann stóra framgongdin er hjá tannáringum, har 1.890 løntakarar vóru í juni í ár, og tað eru 138 løntakarar fleiri enn fyri einum ári síðani.
Eisini vísir tað seg, at alsamt fleiri og fleiri pensjónistar fara til arbeiðis. Í juni í fjør vóru 1.016 pensjónistar til arbeiðis, men í juni í ár vóru gott 100 pensjónistar fleiri til arbeiðis, og tað er ein vøkstur upp á 10,3 prosent.
At fleiri tannáringar fara til arbeiðis kann hava samband við, at arbeiðsloysið er so lágt í løtuni.
- Tá verður eftirspurningurin eftir alternativari arbeiðsmegi stórur, sigur Hagstovan.
Men orsøkin til, at alsamt fleiri pensjónistar eru á arbeiðsmarknaðinum, kann vera tann, at talið á pensjónsum økist.
