Meiri enn 300 gestir vóru til upplatingina síðsta leygardag, og sunnudagin valdu eisini eini 100 fólk at leggja leiðina framvið Tórshavnar Skipasmiðju, har framsýningin er í einum av smiðjubygningunum. Áhugin at keypa málningarnar var eisini stórur. Bæði privatfólk og onnur
listasøvn í Føroyum vóru umboðaði á framsýningini.
Fleiri heraðshorn
Framsýningin vísir Zacharias Heinesen úr fleiri heraðshornum. Tekningar á gamlar brævbjálvar, tekningar frá hansara ungu árum og málningar, sum vísa listarligu gongdina hjá Zacharias Heinesen frá einum ungum manni til ein av frægastu listamonnum í Føroyum.
Ólavur Rasmussen, prestur, helt heiðurstalu fyri Zacharias Heinesen. Ólavur Rasmussen tók støði í teirra kennskapi frá tíðini, tá Zacharias Heinesen málaði altartalvuna til kirkjuna í Husum í Suðurslesvig, har Ólavur Rasmussen var prestur.
Í sambandi við framsýningina er nýggj bók komin út við nýggjum greinum og myndum, sum ikki áður hava verið á prenti.
Framsýningin á Tórshavar Skipasmiðju er opin hvønn dag frá klokkan 15 til 18 fram til 25. juni.
