Klaksvíkingar mangla íbúðir og grundstykki til sethús. Og eftirspurningurin eftir grundstykkjum er nú so stórur, at Klaksvíkar kommuna fer at útstykkja fleiri grundstykki á Helnabrekku.
Á fíggjarætlanini fyri ár 2000, sum hevur fingið 1. viðgerð í býráðnum, er avsett ein lítil millión krónur.
Kommunan hevur eisini grundstykki á vestursíðuni, men hesi leggja fólk einki í, tí tey liggja nakað illa fyri.
? Helnabrekka er heilt greitt tað staðið, sum er mest áhugavert til grundstykki í løtuni, sigur Steinbjørn Jacobsen, virkandi borgarstjóri í Klaksvík.
Fyri nøkrum árum síðani vóru fleiri sethús bygd niðanfyri vegin, og tey nýggju grundstykkini, sum nú fara at verða útstykkja eru omanfyri vegin.
Í fyrstu syftu verða umleið 24 grundstykki útstykkjað, men hetta er bert eitt stig á leiðini, tí verulig íbúðarneyð er við at taka seg upp í Klaksvík.
