- Vit takka Føroya Sjómannadegi fyri møguleikan at skipa fyri Fiskivinnutinginum 2023.
Tað siga tey í Føroya Fiskimannafelag í dag.
Heitt varð á felagið um at skipa fyri Fiskivinnutinginum 2023 í sambandi við sjómannadagarnar í Klaksvík.
Evnið á tinginum var ”Ber til at virðisøkja fiskatilfeingið meira, enn gjørt verður í løtuni, og hvørjar avbjóðingar eru í hesum sambandi?”
Í Føroya Fiskimannafelag ynskja tey eisini, at alt tilfeingið kemur til høldar og verður meirvirkað á skynsaman hátt - á sjógvi ella á landi.
- Endamálið má vera, at tilfeingið gevur arbeiði til fleiri hendur og fleiri inntøkur til partarnar - eisini til tað almenna til frama fyri vælferðina í Føroyum.
Felagið fegnast um, at nógv fólk møttu á Fiskivinnutinginum, sum var hildið í Skúlanum á Ziskatrøð.
Tríggir serfrøðingar løgdu fram, og umboð fyri politisku flokkarnar á tingi søgdu eisini sína hugsan um evnið.
- Fleiri spurningar vórðu settir, og fleiri sjónarmið komu fram í lívliga orðaskiftinum, sum var eftir framløgurnar.
Í Føroya Fiskimannafelag takka tey fyri møguleikan og álitið at skipa fyri Fiskivinnutinginum 2023.
- Samandráttur av Fiskivinnutinginum og ljóðfílur frá tinginum eru at finna á heimasíðuni www.fiskimannafelag.fo
##med2##
