Frákoyrdi libyski leiðarin, Muammar Gaddafi, fjalir seg í býnum Ghadamis, sum er tætt við markið til Algeria, har vápnaðir limir í einum ættarbólki hjálpa honum. Tað sigur ein leiðandi heryvirmaður hjá uppreistrarleiðsluni.
Heryvirmaðurin, Hisham Buhagiar, sum stendur fyri leitingini eftir tí falna leiðaranum, sigur, at eftir øllum at døma var Gaddafi í einum øðrum býi har suðuri í landinum fyri einari viku síðani. Men nú er hann farin til Ghadamis, sum er góðar 500 kilometrar í útsynning úr Tripoli.
Hinvegin bendir alt á, at Saif al-Islam, sum er sonur Gaddafi, er í býnum Bani Walid enn, og at ein annar sonur, Mutassem, er í Sirte, haðani Gaddafi er ættaður. Viðhaldsmenn hjá Gaddafi hava framvegis ræðið á hesum báðum býunum.
