Mikudagin 28. november var íslendski uppsjóvartrolarin, Guðrún Torkelsdóttir, á Fuglafirði, og hetta høvi læt sjómanstrúboðarin, Torleif Johannesen, ikki fara afturvið.
Hann var umborð og vitjaði, og her vistu menn at siga, at teir høvdu roynt eftir svartkjafti í føroyskum sjógvi og høvdu fingið 1200 tons í átta samdøgur.
- Áðrenn kósin varð sett á Eskifjørðin í Íslandi at landa, vóru teir á Fuglafirði eftir olju og reiðskapi frá Vónini, sigur sjómanstrúboðarin á Facebook-síðuni hjá Føroysku Sjómansmissiónini.
Tveir av manningini, Haraldur og Tórur, søgdu, at fiskiskapurin var smáligur fyrstu dagarnar á túrinum, men hann batnaði nakað seinastu tveir dagarnar.
- Tá teir hava verið í Íslandi og landað, koma teir aftur í føroyskan sjógv at fiska svartkjaft. Umleið 10 íslendsk skip royna eftir svartkjafti í føroyskum sjógvi í løtuni, veit sjómanstrúboðarin at siga.
