Finalu­endurtøka

Higartil fylgjast øll átta kvinnu­liðini í Eikliguni í dystar­tali, og hava øll spælt tríggjar dystir í part. Nú fjórða um­far er á skránni, skulu seks av teim­um átta liðunum spæla, og serlia tveir av dystunum eru áhugaverdir.
Talan er um rættar topp­dystir, tí fýra tey fremstu spæla ímóti hvørjumøðrum. Mjølnir og Fleyr hava seks stig í part og SÍ og ÍF fýra stig.
Í Badmintonhøllini í Klaks­vík møtast í morgin Mjølnir og SÍ, sum avgjørt mugu rokn­ast millum liðini, ið fara at kappast í oddanum í vetur. Í Gunda­dahals­høllini í Havn sunnu­dagin tekur Fleyr ímóti ÍF, og her fæst kanska at síggja, um ÍF klárar at hanga við allan vegin.
Triði kvinnudysturin er í Trongisvági sunnudagin mill­um tvey av lægru liðunum, tí har møtast TB og Ternan, sum hava ávikavist einki og tvey stig.
Hjá monnunum, har SÍ, Mjølnir, ÍF og Fleyr hava tvey stig og TB einki, eru tveir dystir sunnudagin. Í Trongisvági, har TB tekur ímóti SÍ, mugu sør­vingar síggjast sum favo­ritar, meðan dysturin í Bad­minton­høll­ini í Klaksvík millum Mjølnir og ÍF sær opin út, tí hetta er endurtøka av bæði FM- og steypafinalunum síðsta vetur.