Eg skrivi ofta um ferðing - lutvíst tí at eg arbeiði á einum ferðablaði og lutvís tí mær dámar so sera væl at ferðast.
Her eru nakrar hendingar frá seinastu vikunum, sum antin hava gjørt meg bilsnan, illan, súran og glaðan.
- Starvsfelagarnir á størsta ferðablaðnum í Svøríki "Vagabond" rópa á meg og siga, at nú taka vit Føroyar av listanum fyri óvanlig ferðamál. Føroyar eru ikki óvanligar at ferðast til longu, heldur journalisturin. Eg mótmæli eitt sindur, tí eg haldi, at Føroyar altíð skulu nevnast. Men tagni skjótt, tí eg má gleðast yvir orðini hjá starvsfelaganum, at Føroyar eru vorðnar eitt vanligt ferðamál. Kanska eru ferðafólk veruliga i ferð við at finna til Føroyar.
- Eg lesi at vit kunnu gloyma at verða bangin fyri turbulensi og óveðri, tá vit flúgva. Ein kanning, sum Federal Aviastion Administration hevur gjørt, vísur, at kaffi er orsøkin til flest óhapp umborð á flogførum. Brennskaðar av heitum kaffi og kaffifiltur, sum eksplodera eru vandarnir.
- Fyri nøkrum vikum síðani tók eg mót til mín og fór yvir til stjóran á Norwegian og spurdi hann um ætlanirnar at flúgva til Føroyar. Hann flennur ofta og nógv - og hart - tá eg spurdi um ætlanirnar at flúgva til Føroyar. Men tá hann skilti, at eg eri úr Føroyum, og hann sá, at eg meinti spurningin í álvara, greiddi hann, frá hví tað er so torført at byrja uppá eina rutu til Føroya - eg umhugsaði at leggja meg á knæ, men valdi ístaðin at biða hann hugsa seg væl um einaferð aftrat.
- Sonurin rópar á meg, tá barnasendingin er í sjónvarpinum. Ein spælifilmur úr Føroyum - men tá børnini í sendingini fáa boð um at fara til Mykinesar, enda tey í Saksun …ella var tað kanska ikki meiningin at ein staðarkendur føroyingur skuldi síggja filmin?
Størsta ferðaráðstevnan í Norðurlondum verður í Gøteborg um góðar tvær vikur - eg síggi á listunum, at Danmark hevur eina pinkalítla umboðan, og at Føroyar ikki eru við yvirhøvur - eru ferðaráðstevnur ikki rætt stað at síggjast á longri?
Tað, sum gjørdi meg illast í miðlunum í seinastuni, er, at øll ikki eru vælkomin allastaðni. Fleiri kanningar vísa, at fleiri og fleiri velja hotell, sum hava barnaforboð - altso hotell, har ongi børn sleppa at búgva. Og so tvætlið um, at tað ikki ber til at byggja ein arm á terminalin í Vágum, so øll ferðafólk sleppa beint inn í flogfarið.
Hugsið tykkum um og gerið rætt!
